Jam 2 | WSK | STEP | Aga singsang, nina Jesus Kristus ko nengemang ningi nunguning aram. Nu nanga Biya Nuam, nikim se nup biya karogo. Buta se, nina munan koma suwanta tala kariimet suen la nungumik te beteralko, kariimet saki la nunga kueral ale saki me nunga ari maguwuralko.

James 2

Munan koma suwanta la kariimet suen la nungumik te bitarko

1 Aga singsang, nina Jesus Kristus ko nengemang ningi nunguning aram. Nu nanga Biya Nuam, nikim se nup biya karogo. Buta se, nina munan koma suwanta tala kariimet suen la nungumik te beteralko, kariimet saki la nunga kueral ale saki me nunga ari maguwuralko.

2 Se ko kausa bo mu iwita: kari ilagala nina Kris alo ninga biguwura ningi taimon. Se bo mu nu nup karogo, kumik mel ago, se gold ring kuting peperek ningi betera se, ko guang yawara yawara mu nagura ale taira. Se bo mu nup mena, kumik mel mena, se ko guang memek karur ago mu nagura ale taira. 3 Se nina kari guang ningo nuam naguram ale tairam mu kiwem ningo kote beteral ale iwita maonal, “Ni kuwim kualala imi te dagiko,” mal, ale kari nup mena, kumik mel mena mu iwita maonal, “ni suwuta sanamir agi iwita aliti dagiko” mal, 4 umutang mu nina ikia memek betesan. Mu awuk, nina tutera kari ko ninimi gurugusan, ale kari nungumik mel ago se kari nungumik mel mena mu nunga tutera karogo keletak nunga tutesan.

5 Aga singsang yawara, ikialko! Kaem nu ali imi te kariimet kituwura guat anisan mu suen biya nunga giam, nuna nongomang ningi nunguning sail ago mu te bagomonko. Ale kingdom yawara Kaem kariimet noko kuawasan mu nungarukko balam umutang nuna tamonko. ^{▼▼James 2:5 Kaem kariimet kituwura guat nunga giam: 1 Cor 1:26.} 6 Bare nina kariimet nungumik mel mena mu mel yam ko nunga betesan!

Se kari ikup ningarsan mu arika ya? Mu kari nungumik mel ago borta ikup ningarsan! Ale ninga tagi nengerak nama den ariga kari nongoma te ninga awusan. 7 Kari borta tala Kristus ko nup yawara nina ago bagasan mu balu maguwusan!

8 Munan den gira imi Kaem ko batoga te aniso: “Keta nimi ko kuesam iwitatala ka bo ko kuarko.” Se nina munan imi karo tuiwasan agi mu, nina terong betesan. 9 Bare nina kilek yawara kari bo ilak betesan, ale bo nibiring tusan agi mu, nina memek betesan ale munan den kiasan. 10 Mu awuk, awiriya munan den suen la karo tuso, bare den mu ningi den suwanta kiaso, mu ko ikia nu munan den suen la kia saposo iwita. 11 Mu awuk, Kaem iwita balam, “Ni saman katagot me bitarko” mam, mu aking kota tala balam, “Ni kari bo moar se me kuerukko,” mam. ^{▼▼James 2:11 Munan den 10 mu Exodus 20 mu te aniso.} Buta se, ni saman katagot me bitar agi, bare kari bo moar se kueruk, mu ni munan den kiara ko kari ko aratasam.

12 Bare Kari Biya munan den imi nangaram, ana nainimi ko kuenakko mam. Se den mu nanga bataguru tauk se yawarakala baganakko terong mam. Buta se, nanga munak te, se nanga betera kaora te, ana nainimi ko kua se baganakko. Mu awuk, mu Kari Biya munan den umutang te iki se nanga tuterukkowo. 13 Se ana nanga saki alo me nunga naneman batagakaso mu, nu nanga tutia se me nanga noman batagukko. Bare ana saki alo nunga naneman batagakaso mu, ana tutera kam te me nguanganakko. ^{▼▼James 2:13 Ana saki alo nunga nangamang batagukko: Mat 5:7; 6:14-15; 18:32-35.}

Gemang ningi nunguning agi mu ko nunguning ago bitarko

14 Aga singsang alo, kariimet nunumi balsan nongomang ningi nunguning karogo ma balsan, bare nuna ko nunguning kilek yawara bo me betesan, mu nononga nongomang ningi nunguning mu awuk ta nunga sangukko? Mena. ^{▼▼James 2:14-15 Ana nunguningta nanga saki alo nunga kuenakko, nagiring te la mena: Mat 7:21; 25:41-45; 1 John 3:17.}

15 Se ko kausa bo mu iwita: Ni ka Kris launuria bo agi, keras bo agi, kumik guang ningo bo mena, se na yu bo naukko mena tala, 16 se ni kiring la manaru, “Aga bo, namarko! Kaem nikerak bagoso,” ma balu, ale “Na yu no se, kimik kowar la lagerko,” ma balu, bare ni guang bo agi, inang yu bo me tui, mu ni den la manem mu nu sanguk i? Mena. 17 Iwitatala, kari bo gomang ningi nunguning ago maso, bare ko nunguning bo noko betera kaora te me aratoso, mu noko gomang ningi nunguning mu nunguning mena.

18 Se bo agarak den tagirok ale baluk, “Mu terong. Bare kariimet saki nongomang ningi nunguning karogo, se aking kariimet saki kilek ningo betera ko sail tagisan.” Nu uwuta baluk agi, bare ani iwita nu manikko: ni kilek ningo me bitar mu, ani awuk ta nika ikiek ni gemang ningi nunguning ma balikko? Mena. Bare ani angamang ningi nunguning ago mu ni aninga betera kaora ningo mu te am aga ikiko! 19 Kaem suwanta, se ni umutang ko gemang ningi nunguning e? Mu terong! Bare Satan ko bur memek mu nuna karogo tala umutang ko nongomang ningi nunguning, se nguangara biya karogo bagasan! ^{▼▼James 2:19 Bur memek Jesus ko ikiman ale nguangaman: Mat 8:29.}

20 Ni ngualara, ikia mena agila! Ni nimi balu ale gemang ningi nunguning ma balu, bare ko nunguning ka kilek yawara bo aratoso se ani me arigisam, se uwuta mu, nika gemang ningi nunguning mu mel yam!Se te ikiko mu, anananga girigir Abraham te balik se ikiko. 21 Girakala Abraham ko namar Isaac te Kaem tama bita tuokko se, patawu altar awete beteram. Se Kaem kilek mu arigam ale umutang ko nu Abraham ko balam, “Ni kari ningo diram,” mam. ^{▼▼James 2:21-23 Abraham: Gen 22:9-12; Isaiah 41:8; Heb 11:17-18.} 22 Mu iwita: Abraham Kaem ko gomang ningi nunguning, se Kaem nu aguwaya bitirukko maonam mu nu eng te beteram, ale te numi wetang te beteram mu noko gomang ningi nunguning mu nunguningta. 23 Se Kaem ko batoga imi ko nunguning aratam: “Abraham nu Kaem ko gomang ningi nunguning aram, se mu ko Kaem nu kari ningo diram ko balam.” Ale balam, “Ni aninga bo,” mam.

24 Buta se, nina aitak ikisan, Kaem kari bo ko balso kari ningo diram maso, mu kari mu ko gomang ningi nunguning mu te la me balso. Mu nu gomang ningi nunguning se kuring karo tuso umutang te Kaem nu ko balso nu kari ningo diram ko ma balso. 25 Koma suwanta tala, lage luan imet Rahab mu nu kari Joshua nunga awuram se tetela la Jericho wonong aringimonko taiman umutang nunga sinar tam, ale lage bo kigilik te aratomon ale nagumon pelemonko mu nunga kausam, se te arataman ale nagu gilingiman. Se mu te Kaem noko balam mu nu imet diram mam.g

Umutang ko, kari ko marak aratoso se kumik guang la aniwoso se ana ko balsan kueram masan mu turantala, ana nangamang ningi nunguning ago ma balsan, bare ko nunguning kilek ningo ningo te me betesan, mu anananga nangamang ningi nunguning mu nunguning mena, kari kuera iwitatala.

26